MUSELÓN, NON GRACIES

L’Ensame pola Cultura Nacional Asturiana (ECUNA),
federación d’asociaciones y entidaes del país asturianu,

CONSIDERARÁ UN ESTROZU TOTAL AL PADRIMONIU NATURAL, CULTURAL Y ARQUEOLÓXICU DE XIXÓN Y D’ASTURIES CUALESQUIER INTERVENCIÓN NEL PAISAXE DEL CABU TORRES.

La Campa Torres ye un llugar privilexáu pa la conocencia del orixe cilúrnigu (los caldereros, en llingua celta) de Noega y de la propia ciudá de Xixón. Nella puen apreciase muries de módulos del sieglu VI enantes de la nuesa dómina, carauterístiques de los castros satures, como’l del Picu’l Castru nel conceyu costeru de Caravia. El valir arqueolóxicu y xeográficu d’esti castru costeru ye incalculable.
Esti fechu foi reconocíu pol profesor Maya, pol profesor Marco Simón, na obra de Blázquez, de Baquedano, los investigadores del castru vacceu de Peñafiel (Valladolid), los de los torques de Benavente, Santos Yaguas, Tuñón de Lara, Bouza-Brey, Romero Masiá, Villares, el Muséu Etnográficu de Miranda del Douru, el Coleutivu d’Estudios Etnográficos Belenos, El Garrapiellu, ANA, el Foru Arte Ciudá, Adán Álvarez, Prieto Molina (Universidá Complutense de Madrid), el profesor Javier Fernández Conde de la Universidá d’Uviéu, l’arqueólogu Anxel Villa y reconocíu tamién pol mesmu Jorge Camino. Inclusu pola Asociación Asturcelta de Madrid, Andecha pol Raigañu del Centru Asturianu de Barcelona y l’antigua Lliga Celta d’Asturies. Asina como polos investigadores irlandeses Daithi O hOgain (UNESCO y University College de Dublín), los bretones Jan Markale (etnógrafu), Minois (hestoriador) y Alan Stivell, Los Chieftains, T. W. Rolleston, Sainero, Cunliffe (Universidá d’Oxford), L. Delgado, el premiu nobel irlandes Seamus Heany y la escritora irlandesa Marie Heany, l’agrupación d’estudios Céltica d’Italia, Fernández Mc Clintock, amás de los investigadores del país y les asociaciones asturianes del campu etnográficu, antropolóxicu, arqueolóxicu y de defensa del padrimoniu.
Na estaya simbólica y cultural, la tema apaez nel llibru La voz de Lug editada en Madrid, de Toti Martínez de Lezea escritora de novela hestórica, da nome a la Banda de Gaites Noega de Xixón y apruz nel nome del yá despaecíu grupu de música folk asturianu Cilurnia, de los años noventa.

· Dende ECUNA, les asociaciones culturales del país denunciamos que l’Ayuntamientu Xixón y el Gobiernu asturianu namái que fomenten interesadamente la romanidá y quieren tapecer cualesquier niciu del pasáu celtiegu xixonés y del conxuntu del pueblu asturianu.

· Refugamos d’igual mena’l macroproyeutu del Ministru de Fomentu, más agresivu col entornu y col mediu natural y paisaxísticu del Cabu Torres, que l’alternativa ufiertada poles instituciones llocales. Tamién encamentamos la renuncia a toles alternatives presentaes poles autoridaes socialistes, que son los que-yos correspuende la xestión del puertu d’El Musel al traviés de l’Autoridá Portuaria, l’Ayuntamienu y el Gobiernu de la Comunidá Autónoma d’Asturies.


Tino Lozano y Fonsu Martín
Coordinadores d’ECUNA

Trátase de torgar la destruición del entornu del castru celta de Noega, habitáu polos cilúrnigos dende'l sieglu VI enantes de la nuesa era.
Los proyeutos ufiertaos pol Ministeriu Fomentu (PP) y pol Ayuntamientu Xixón (PSOE) suponen un grave atentáu ecolóxicu y paisaxísticu a esti enclave arqueolóxicu asitiáu no alto del Cabu Torres, a un llau de la Bahía de Xixón.
ECUNA refuga toles intervenciones nesti espaciu arqueolóxicu que nun seyan pal acondicionamientu del entornu.