Los Derechos Históricos Asturianos


Ú
n de los conceptos xurídicos más controvertíos dientro de la más recién doctrina constitucionalista ye'l de la precisión y les llendes de los llamaos Derechos históricos de les nacionalidaes. Xunto a ello tamién podríemos amestar otres discusiones paraleles acerca del significáu y alcance, en términos doctrinales, de los propios conceptos de nacionalidá o de comunidá iestórica a los que repetidamente se refieren los modernos y vixentes testos llegales.

La Constitución Hespañola de 1978, testu ambiguu frutu del consensu políticu de los partíos mayoritarios más representativos d'aquella dómina, consagra el respetu a los llamaos Derechos históricos como una realidá política esistente y anterior a la propia Constitución y qu'esti testu llegal nun instaura o constitúi sinón que vien a reconocer o respetar como una materialidá xurídica preesistente a la propia norma constitucional , reconocimientu que se fai al empar que se dota de carácter institucional a los derechos a l'autonomía de les nacionalidaes y rexones.

Hai que reconocer, ciertamente, qu'ún de los problemes más avegosos na historia del constitucionalismu hespañol y de la configuración d'hespaña como estáu foi y ye l'enxartamientu de les distintes realidaes nacionales que se manifiesten dientro del ámbitu territorial del estáu hespañol encuantes a la so estructuración política, de xeitu más o menos xunitariu o federalizante, según les corrientes y tendencies polítiques manifestaes a lo llargo de la hestoria. Esta dialéctica centrífuga o centrípeta en términos políticos manifiéstase non sólo nel ámbitu material del Derechu, el derechu aplicable a cada territoriu, sinón tamién nel ámbitu más formal del Derechu, el de la organización político-pública que rixe el furrulamientu del propiu estáu.

Destamiente, los derechos civiles d'aquelles naciones con un corpus xurídico-priváu propiu constituyeron y constitúin una realidá material incuestionable como argumentu contra la xunificación xurídica nel ámbitu civil y polo tanto na llexislación civil que-yos afectara y la competencia encuantes a la so regulación. Tamién nel ámbitu públicu o formal, aquellos territorios qu'anteriormente esfrutaron d'unes instituciones públiques representatives o de goviernu propiu y que fueron suprimíes por decisión política partidista, teníen el derechu a reclamales o reinstaurales non yá por nueva decisión o pesión política sinón mui especialmente pol conceptu de reclamación historicista de los antiguos derechos territoriales y materiales a los que se calificaba como hestóricos.

El programa políticu territorial que la monarquía de Felipe V deseyaba imponer nel estáu supuso darréu la supresión por decretu de los órganos públicos de representación y alministración d'aquelles comunidaes, les que pertenecieron a la Corona d'Aragón, que llucharon contra la causa borbónica na guerra de Sucesión. Esta medida resultó ser una política partidista del goviernu de Felipe V que pretendía anular la oposición que pudiera surdir por parte d'estes instituciones non sólo no tocante a les discrepancies na política borbónica sinón mui especialmente na oposición manifestada hacia la propia persona del monarca encuantes a la negación de la so lexitimidá política pa ocupar el tronu d'Hespaña y la xefatura del estáu y del goviernu, y too ello baxo la coartada d'una supuesta xunificación xurídica y política baxo'l mesmu marcu del Derechu de Castiella. Asina, Felipe V tamién anuló unilateralmente tol corpus xurídicu propiu producíu nestos territorios, tanto lexislación pública como privada, decretando la implantación nestos territorios del Derechu de Castiella. Lo cierto ye que n'época de la monarquía absolutista la xunificación xurídica, de fueros, o lexislativa nun esistía y la prueba de que la supresión nos reinos d'Aragón de les instituciones propies supunxo una medida partidista de castigu llevada alantre pola política del monarca foi el fechu de la pervivencia d'otres instituciones públiques similares en territorios como Asturies y Navarra que sí acataron la lexitimidá de la nueva dinastía y del nuevu rei y que nun exercieron oposición política hacia la causa borbónica.

Un sieglu depués, col triunfu n'Hespaña de los partíos lliberales qu'arroparon l'ascensu al tronu de la xoven reina Isabel II, volvióse replantear el problema de la reestructuración política del estáu hespañol. Entós la política de los lliberales decretó la supresión de la Xunta Xeneral del Principáu, muérganu de representación y autogoviernu del pueblu y territoriu d'Asturies dende tiempu inmemorial, y que representaba una torga insalvable pa la implantación del nuevu réxime d'alministración territorial del estáu a imitación de los departamentos franceses. Asina, la cámara de representación política del Principáu d'Asturies quedó suprimida y sustituída por una entidá alministrativa carente d'autonomía o representatividá política del territoriu históricu asturianu como yera la Escelentísima Diputación Provincial d'Uviéu.

Durante la II República hubo un intentu, non fructíferu por causa les revoluciones y guerres civiles desarrollaes n'Asturies nos años 30 del sieglu XX, que tenía como fin la implantación d'un réxime d'autogoviernu asturianu, con un parlamentu democráticu y un goviernu propiu de departamentos o ministerios asturianos con competencies propies nes diverses materies asumíes.


La reinstauración democrática de 1977, atopóse nuevamente énte'l vieyu debate non resueltu de l'articulación política y territorial del estáu, entá ensin solucionar y depués de sieglos de cambios políticos, dinásticos, partidistes y de goviernu. La dialéctica ente'l centralismu y el centrifuguismu terminó con un trunfu de les tesis anticentralistes en parte pola presión política de la periferia que reclamaba un nuevu modelu d'organización política y territorial nunca visto na hestoria anterior y que superaba les esperiencies estatutaries desarrollaes durante la República pa llograr un mayor grau d'autogoviernu cuando non d'algamar la independencia por métodos violentos o d'insurrección. Les referencies a la restitución de derechos de la hestoria quedaron polo tanto superaes y a lo que s'apelaba yera simplemente a la voluntá del pueblu de cada territoriu manifestada naquellos momentos o más propiamente dicho les demandes polítiques veníen a satisfaces les aspiraciones de los dirixentes políticos d'estos territorios que gozaben de representatividá popular conseguida a través d'organizaciones polítiques de signu nacionalista.


Los representates d'estos partíos nacionalistes esixíen nel marcu de la organización política del estáu un réxime especial de representatividá dientru d'él, yá que los indepententistes nun participaron nel debate, en forma d'unos estatutos d'autonomía con grandes competencies presupuestaries, materiales y organizatives. Asina, nun principiu les aspiraciones de los nacionalistes con representación en Madrid aspiraben a que sólo Cataluña y Euscadi gozaríen d'un estatutu d'autonomía y un parlamentu y goviernu propios, dexando'l restu del territoriu pa la sola alministración centralizada del estáu. Esta aspiración de los nacionalistes vascos y catalanes nun podía aceptase en términos d'organización xeneral del estáu según el precedente constitucional republicanu que permitía el accesu al autogobiernu y a los estatutos d'autonomía pa toles rexones polítiques y territorios coloniales por igual ensin privilexos o prohibiciones encuantes al so grau d'autogoviernu. Destamiente, los ideólogos del nuevu constitucionalismu incluyeron a Galicia como tercer comunidá "autogovernable" en parte pa contrarrestar la dialéctica nacionalista de les dos comunidaes más reivindicatives yá qu'esta comunidá nun disponía nesi momentu en Madrid de representatividá nacional propia diferente a la de los partíos estatales y amás esistía el datu de l'anterior aprobación d'un estatutu gallegu en tiempos de la República. Destamiente, el modelu d'escepcionalidá autonómica que reclamaben vascos y catalanes n'esclusiva pa les sos comunidaes pronto foi perdiendo pesu nel debate del modelu d'estáu y asina foi abriéndose pasu a una supuesta xeneralización del réxime d'autonomía pa tolos territorios, históricos o non, del estáu siguiendo la filosofía de la constitución republicana. Asina pronto amestóse Andalucía como cuarta comunidá "autogovernable" ásicamente polos insistentes deseyos del ministru d'Alministración territorial d'entós, Clavero Arévalo, que yera andaluz. El goviernu del presidente Suárez, asina decantábase abiertamente por dividir la totalidá del territoriu estatal en cuantes rexones autónomes fueren precises, pero los nacionalistes vascos y catalanes refugaben del "café pa toos" y preferíen un réxime asimétricu , escepcional y privilexáu d'autogoviernu. Esistió naquellos años con too cierta falta de valentía y escesu de temor yá que'l recién goviernu democráticu nun s'atrevió a camudar los límites alministrativos provinciales y tampoco suprimió dafechu les obsoletes Diputaciones provinciales que a toes lluces resultaben como mínimo incongruentes o incómodes pa los futuros gobiernos autónomos. Años depués y con una cierta pirueta política entá non desplicada suprimiéronse les Diputaciones sólo naquelles comunidaes uniprovinciales. Hai que reconocer tamién, qu'aquella dómina requería más que nada Abondes dosis de prudencia yá que l'estáu víase sometíu menacies d'involución, de violencia política y crisis económica, amás, el fechu de camudar los límites provinciales supondría el tener qu'entamar otru debate nuevu paralelu al de la configuración de los límites autonómicos pues había territorios o provincies que nun deseyaben la so inclusión nunes autonomíes o qu'incluso supuestamente manifestaben un deséu de formar autonomíes uniprovinciales camentando qu'esta solución traería mayor beneficiu políticu y económicu. Recordemos por exemplu que'l nacionalismu vascu aspiraba a la inclusión n'Euscadi de la provincia de Navarra amás d'otros territorios españoles y franceses. Lleón, Segovia, Murcia y Madrid queríen formar una autonomía por sí mesmes.

Asturies, nación y reinu en llonxanu sieglu, foi la quinta comunidá "autogovernable" pa la que s'entamó discutir un estatutu, anque esistieron intentos d'una amestadura territorial cola vecina provincia de Lleón y inclusu camentóse nun estrañu estatutu conxuntu con Santander. Cantabria y La Rioxa surdieron como comunidaes autónomes nueves pa frenar en parte el nacionalismu vascu anticastellanu. El mapa completáronlu Ceuta y Melilla como "ciudaes autónomes" con estatutos d'autogoviernu.


Sin embargo, hai que reconocer que les tesis de los nacionalistes vascos y catalanes foron les que terminaron por triunfar al promulgase l'engañu que supunxo pa la mayor parte de la ciudadanía del estáu aquelles célebres dos víes pal accesu rápidu o lentu a l'autonomía y que desembocaron nunos negros túneles que conformaron materialmente unes autonomíes de primera, con mayor poder políticu y presupuestu, y unes autonomíes de segunda y incluso de tercera, debío a la estraña política de trespasos competenciales más xenerosos pa unes comunidaes qu'otres ensin ningún criteriu determinante de mayor o menor hestoricidá, mayor o menor demanda social o política o mayor o menor convebiencia pa una más racional governabilidá del estáu y los territorios. Más bien el repartu de competencies y trespasu de servicios estatales como policía, xusticia, carreteres, emplegu ente otres munches facíase según conveniencies o desavenencies puntuales frutu de la práctica política del día a día y del intercambiu o de l'afinidá d'intereses negociables o partidistes. La situación a la que se llegó anguañu ye la d'una organización totalmente asimétrica del estáu onde una comunidá autónoma nunca tien les mesmes competencies que les sos vecines y onde los ciudadanos non sólo sufren estes desigualdaes y agravios ente comunidaes sinón que tamién tienen que padecer los vaivenes políticos y les mayoríes nel goviernu central , les polítiques esteriores y europees de les autonomíes más poderoses y la inseguridá frente a los constantes cambios, materies pendientes, formes de financiación indeterminaes, impuestos trasferíos o non, esenciones fiscales o recargos impositivos provenientes d'una o d'otra comunidá con mayor o menor fuerza política o con mayor o menor grau d'autonomía política, fiscal, o guvernativa.

Asina, nun principio parez suponer que l'apelación a los llamaos derechos hestóricos de les naciones pue quedar superada pola constante y creciente aspiración política de delles comunidaes que yá nun aspiren a ser lo que fueron sinón simplemente a tener más que lo que tienen otres, a recibir más fondos y competencies que les otres o incluso a aspirar a una autodeterminación o secesión, esto ye, a francir col pasáu y colos vieyos fueros o reinos y algamar un marcu novedosu de soberanía o independencia.

¿Cómo podemos entós, y a la vista d'esta evolución na determinación política del marcu constitucional hespañol, entamar una definición actual del conceptu xurídicu de los llamaos derechos hestóricos?

Primeramente hai que precisar que los derechos hestóricos nun son una especie de lliteratura xurídica o doctrinal como nun principiu se pudiera camentar sinón que son norma xurídica material dafechu, parte integrante del ordenamientu xurídicu supremu del estáu como ye la so másima norma constitucional, esto ye, los derechos hestóricos, formen asina parte de la constitución, de la organización política del estáu.



Fecha esta primer aclaración ¿Cuáles son entós los derechos hestóricos asturianos?¿Ye Asturies una creación política nueva frutu de la voluntá constituyente de la Carta Magna de 1978 o más bien ye una realidá política anterior dotada d'unos derechos forales y polo tanto hestóricos y que la Constitución nun vien más que a respetar, reinstaurar o reconocer?¿Cómo podemos xustificar el fechu de qu'esistan unes comunidaes con derechos hestóricos y otres ensin ellos?¿Qué supón a efectos prácticos el fechu de qu'Asturies disponga d'un derechu especial o foral?¿Ye ello un privilexu, una vuelta al pasáu, el reconocimientu d'una realidá hestórica anterior, la reparación d'unos erros cometíos nel pasáu contra delles comunidaes?¿Reconoz la Constitución unos derechos especiales como los de ser nación o nacionalidá frente a los derechos xenerales o comunes de ser rexón?¿Puede identificase nacionalidá con territoriu aforáu y rexón con teritoriu ensin fueru o especialidá normativa? Pa toes estes entrugues la doctrina vien esponiendo les más diverses respuestes, dictámenes y valoraciones que tienen como telón de fondu el controvertíu tema de los derechos hestóricos que menciona la Constitución na so disposición adicional primera, qu'establez con fuerza normativa incuestionada l'amparu y respetu constitucional a los derechos históricos de los diversos territorios forales.